絲絲講場：建行勁舞Show新制服

換上新裝跳「龍的傳人」

絲絲尋日去咗佢哋嘅發佈會，八個八十後分行職員換上新制服後行Catwalk，好醒神，但估都估唔到，佢哋最後同場加映着制服跳勁舞，背景音樂仲要係Disco版「龍的傳人」，真係相當「給力」！

事實證明，着西裝、A字裙都唔一定變機械人，只要設計得宜，銀行職員都可以跳到十字步，真係相當有創意！

表演員工個個係精英

其實呢八個分行職員都唔簡單，因為佢哋只係練習咗兩三個禮拜，就已經跳得有板有眼。

建行亞洲常務副行長郭珮芳（Miranda）就話，佢哋係公司精心挑選出嚟表演，事關好多員工都對今次表演好有興趣，報咗名都要揀過先有得跳！

Miranda就話自己都好鍾意套制服，原來舊嗰套已經着咗三年，都係時候換吓款。佢仲講咗一個小秘密畀絲絲聽，原來女裝制服條A字裙係橡筋頭，所以跳舞都無問題！

余絲韻