愈嚟愈多人鍾意玩長跑，渣馬更加係香港嘅體壇盛事，不過少少哋都要跑十公里，唔想跑咁長嘅朋友今年有多個選擇，就係由AIA冠名贊助嘅香港第一屆Electric Run喇。AIA香港及澳門首席執行官陳榮聲（Jacky）除咗叫埋佢嘅TEAM一齊跑之外，更加吹雞叫埋AIA嘅員工一家大細一齊玩添。
比賽會喺十一月二十八同二十九日，喺中環海濱長廊舉行，路程全長5公里，到時跑道周圍都會有七彩繽紛嘅燈飾同埋電子音樂，跑手更加可以着上各種發光物料令自己都變埋燈飾。一齊狂歡之餘，仲可以欣賞維港夜景，又唔使晨咁早起身同曬到身水身汗。據講AIA會打造不同夢幻場景，大家唔好淨係掛住欣賞場景，唔記得跑。
Jacky話，平時雖然忙但好着重Work Life Balance，之前四年都有同佢嘅Team玩無國界醫生野外定向，認真健康。
p:佩戴發光衣飾最醒目
其實Electric Run喺全球都好Hit，外國反應咁好可能為今次嘅活動打咗支強心針。AIA今次活動目標係吸引二萬人參加，仲話如果反應熱烈，可能會提早截止報名添！Jacky提醒各位參賽者，可以各式各樣嘅發光裝置，為自己設計最「搶眼」參賽服飾。
余絲韻