絲絲講場:Twitter出錢請黑客「捉蟲」

最近蘋果嘅iCloud系統被黑客入侵,大批女星裸照喺社交網站流出。其實佢不妨學吓Twitter、facebook,搞啲「搵Bug」嘅獎勵計劃,用獎金鼓勵黑客將系統漏洞提交畀公司,咁就唔使出咗事先嗌救命喇。

Twitter早前推出名為HackerOne嘅獎勵計劃,鼓勵黑客發掘喺iOS、Android同埋其他版本Twitter嘅潛藏漏洞,至今已有44位黑客提交咗46個漏洞,而Twitter亦將黑客嘅名同佢哋發現嘅問題「公諸於世」,並且立即修復好所有漏洞。

每個Bug至少值千元

計劃嘅成本唔算低,每個提交Bug嘅黑客會獲得最少140美元,相當於1,092港元嘅獎賞,而金額仲會因應問題嘅嚴重性而調整。

不過班黑客既然搵到啲連公司精英都意識唔到嘅漏洞,呢筆錢又值得用嘅,加上個計劃真係雙贏,黑客可以將技術運用喺正當用途,公司又可盡早發現系統嘅漏洞。

余絲韻