好多科企巨頭高層嘅出身同佢哋畀人嘅印象都有好大嘅落差，阿里巴巴嘅開國功臣蔡崇信嘅市場策略一流，佢喺投資同埋運動嘅天賦才能，都令人另眼相看。絲絲以為佢同馬雲一樣熱愛足球，原來曲棍球先係佢杯茶。
台灣出生嘅蔡崇信，13歲就飄洋過海去咗美國讀中學，睇佢依家滿口流利嘅英文，加上出身自顯赫嘅律師家庭，大家一定覺得佢從小就接受外語教育，邊個會估到原來佢去美國前幾乎完全唔識英文，竟然喺短短嘅中學生涯裏面練得一口純正嘅英文，絕對係個相當聰明嘅人。
雖然蔡崇信平時斯斯文文咁，但喺讀耶魯大學時，佢就係曲棍球場上嘅健將，連隊友戈登都大讚蔡崇信喺曲棍球場上好努力，係隊裏面「可靠嘅存在」。戈登見證住朋友嘅成就，仲話一早就覺得蔡會對世界經濟有好大嘅貢獻。
佢喺運動場嘅另一特點，係做佢認為應該做嘅嘢。佢一反運動員傳統，喺胸前戴起一塊粉紅色、象徵支持同性戀權利嘅飾物時，即刻畀隊友笑，佢反而理直氣壯咁話，呢件係應該做嘅事。
雖然蔡崇信有各方面嘅才能，但佢絕對唔會恃才傲物，相反非常低調謙虛。佢曾經辭咗一份喺投資公司年薪70萬美元（約546萬港元）嘅工，而大膽跳槽去當時只喺起步階段嘅阿里，接受只有600美元嘅年薪。
好彩依家阿里搞得有聲有色，喺美國嘅估值仲超過2,000億，蔡崇信呢個「灰王子」都可以話係守得雲開見月明喇。
余絲韻