大家仲記唔記得蘋果公司（Apple Inc.）曾經有位叫Sam Sung嘅員工？因為個名同Apple死對頭三星（Samsung）「撞到正」，印有佢大名嘅員工卡片曾經喺網上瘋傳。唔知係咪見大家群情洶湧，依家已經離職嘅Sam Sung決定將張卡片，連同舊制服同頸繩放上eBay拍賣，收益會用作慈善用途。
曾經喺加拿大Apple Store工作過嘅Sam Sung話，連佢啲朋友都覺得好諷刺，但就話自己個名對佢喺Apple嘅工作無特別影響。對於自己個名引發咁大回響，佢坦言當初都好擔心可唔可以保住個飯碗，但感激公司用盡方法令佢可以安心繼續工作。
Sam Sung仲話，未見過教主喬布斯真人，但喬布斯去世時佢非常傷心，雖然員工離職後一般都唔應該留住公司嘢，但因為喺Apple工作係佢工作生涯中最有趣嘅經驗，所以想留個紀念。
佢無直接回答點解離開Apple，但可以肯定嘅係，依家喺獵頭公司工作嘅佢，仲用緊舊東家出品嘅iPhone。至於會唔會去同佢個名「襯到絕」嘅三星工作，佢話如果有適合嘅機會，都會考慮咁話。
Sam Sung仲講明，拎出嚟拍賣呢張係佢留低嘅唯一一張卡片。今次拍賣到月中先結束，但競價已經去到6,000美元，即係港紙約4.68萬元，值唔值得就見仁見智喇。
余絲韻