絲絲講場：小米攻印低估米粉熱情
正當三星同蘋果公司喺智能手機市場上鬥得難分難解嘅時候，小米已經陸續打開世界之門，最近就向印度進發。
印度係中國以外，另一個新興智能手機大市場，人口雖然少過中國，但都有成10億人，小米嘅胃口應該都有番咁上吓啦。點知畀絲絲發現佢哋第一次開售都淨係放得10萬部出嚟，你話小米搞乜鬼呢。
計錯數賴人fb冇like
由Android跳槽過小米科技度做全球副總裁嘅Hugo Barra，尋日就接受印度網站Digit訪問時親身解畫。查實呢，佢都承認自己低估咗小米喺印度嘅受歡迎程度，佢仲賴一眾印度米「粉」之前無讚好facebook個開售宣傳，先搞到佢計錯數。
為咗應付一班如狼似虎嘅印度「米粉」，Hugo就應承大家，之後會逐步增加開售名額，包括幾星期後推出嘅紅米。
飢餓銷售 出貨實少
但加還加，大家都係唔好太樂觀，事關Hugo話唔會加好多，因為印度版小米無論喺包裝、軟件、標誌，抑或係官方要求都同中國版有分別。無得用中國貨代替之餘，又要確保質素，所以Hugo話寧願大家等下，好過賣咗啲問題小米出街喇。
計絲絲話呢，講乜都嘥氣，小米唧啲唧啲咁賣，無非係用飢餓銷售法令你哋班餓鬼爭餐懵，爭到可以周圍晒命，爭唔到咪等下輪，最後得益嘅都係小米。
余絲韻