絲絲講場:調查:想買樓咪靠儲蓄?

香港人最緊要就係有層樓揸手,康宏最新調查發現,有四分一嘅三十歲以下年輕人視買樓為最想實現嘅人生目標,仲多過擁有高學歷(15.5%)同環遊世界(11.5%),果然都係買磚頭先最實際。

不過佢哋個調查就話,如果單單靠儲錢嘅話,買樓大計睇怕至少都要等14年。

儲錢置業起碼要14年

一個21歲嘅畢業生打份月入萬幾蚊嘅工,要到35歲先儲夠錢畀首期上車,康宏行政總裁馮雪心舉咗個例子,一位月入12,000蚊嘅畢業生,即使個個月儲起三分一人工,即係4,000蚊,就算當佢每年加薪5%,都最少要14年先儲到三成首期(90萬元)買個300萬嘅單位,當中都仲未計其他雜費,結論係就咁儲錢都幾難圓置業夢。

投資賺9厘十年上車

佢建議年輕人盡早開始理財,上面個例子如果加埋每年有9%投資回報,可以慳番4年時間,即係儲10年錢就上到車。不過,有做開投資嘅年輕人不足兩成,好多人認為自己冇多餘錢同足夠知識去投資。

其實依家已經有八成年輕人話自己有儲開錢,其實後生仔女都唔係大家想像中咁大花筒,計絲絲話,首期儲10年都唔係問題,最大問題係10年後仲有冇300萬嘅上車盤畀你買先?

余絲韻