Market Insight：基建股有望開快車

周永康遭立案審查，打貪打了隻大老虎，市場認為消除不明朗因素，對中國長遠改革利好。古勝睇番一二年九月薄熙來案審理及開除黨藉，恒指其後在四個多月內由20,000點升至24,000點，政治形勢轉趨安定之後，股市通常亦會有良好反應，在中外皆然。

今次稍有不同的是，恒指已經升定先，尤其近七個交易日累升1,345點，昨日午後升幅曾大幅收窄至僅得20點，國指更一度倒跌，A股亦先升後跌，多少已反映「利好因素」。

石油行業受周永康案牽連甚廣，今年以來大整頓，油服股最慘情，因為多個項目因此延後，故立案後反而證券界認為可釋放價值，百勤油服（02178）和華油能源（01251）分別升10%和6.7%。中國大小工程審批程序繁複，好多上市公司將利潤化作「交際費」，所以打貪長遠利好作用毋庸置疑，但短期陣痛難免。

古勝冇點你

萬里長空

鐵路投資料可提速

其實唔止油服股，今年好多項目工程都開慢車，鐵路投資原本兩度加碼至8,000億人仔，但上半年只完成三分之一，而固定資產投資亦由去年增長20%以上放慢至17%左右。原因大家可意會，當打貪打得如火如荼，審批項目隨時有瓜田李下、收受利益之嫌，所以寧願謀定而後動。

至於今次打老虎之後，項目審批會否回復「正常」就暫時是一廂情願，因為官場短期內仍會人心惶惶，未必可即時「復甦」。不過，鐵路投資有中央拍心口保證，所以市場較有信心下半年可以大提速，鐵路股早就唔算落後，反而基建股可以一諗，今年出口同內需均差於預期，「三頭馬車」依舊要靠固投支撐。

中鐵（00390）、中鐵建（01186）、中交建（01800）及中冶（01618）等基建股近期已回升不少，中冶為18個月新高，「兩鐵」則跟住鐵路股一齊炒，中交建算是比較落後，今年上半年靠海外訂單支持增長，如果內地訂單亦回復較快增長，今年訂單金額有望超出管理層10%之增長指引。

高鑫升得似模似樣

睇估值，中鐵今年預測市盈率7.2倍、中鐵建為6.3倍、中交建為5.3倍，中冶較少大行為其提供預測，但上半年新簽合同按年勁升62%，股價強勢主要是炒復甦憧憬。雖然幾隻基建股今年盈利增長可能只得單位數字，惟未來可望重拾動力，現時買入未算遲。

昨日港股在高位現波動，到底係高手較量抑或大戶營造恐慌，震人落車，就要做事後孔明。板塊方面，終於見到有新面孔，如油服股、百貨股同紙業股。油服股異動原因已經啱啱講過，惟見昨日板塊交投未算太過突出，暫宜先作觀望為妙。

至於百貨股，表現較突出的有高鑫零售（06808）及歲寶（00312），收場分別升4%及9%。高鑫自本月中前低見8.5元水平後止跌回升，昨日一度高見10.5元，觸及250日線，收報9.9元，成交大增，相信整固後仍有力再上。至於歲寶，晒士相對細，雖然昨日升勢有成交配合，但唔知會唔會得一日貨仔，二選一當選基金股高鑫。

近年智能手機同平板電腦大行其道，加上內地經濟增長放緩，用紙需求增長放緩，紙業面對供需失衡，相關股份估值低迷。不過，見昨日理文造紙（02314）股價升幅擴大，高位見4.73元，收報4.69元，升7.3%，成交1.13億元。該股今日公布中期業績，係咪有春江鴨水暖先知，預視佳音將至而先行上車，抑或純綷係魚缸水源充足資金短炒落後股，不得而知。

理文業績兩手準備

不過，在紙業股中，理文造紙的經營表現算係行業翹楚，過去兩年純利均保持增長，若中績對辦，短炒一轉亦不為奇。做定兩手準備，圖表顯示，250日線處4.76元，再向上5至5.2元區域阻力非輕，冇貨依家先嚟追值博率心裏有數；一旦中績表現未有驚喜，股價掉頭跌穿4.4元的話，就要提防反彈完成，並再次尋底。

古勝