蘋果公司嘅「大芒」iPhone 6傳聞九月推出，「果粉」們引頸以待，但更緊張嘅莫過於廠商，因為Apple訂單絕對不容有失。
台灣傳媒指，iPhone 6生產商之一鴻海董事長郭台銘已飛到內地廠房，親自督工生產被指難度較早幾代高嘅iPhone 6。
另外，尋日網上再流出iPhone 6「真身」嘅圖片，傳說中嘅弧形可能係真o架！
傳聞Apple下令廠商今年底前，付運最多達8,000萬部4.7吋及5.5吋iPhone 6，兩大台灣代工廠鴻海同和碩預料喺八月要全速開工。
而鴻海負責組裝七成4.7吋iPhone 6，仲喺九月獨家生產「大芒」iPhone，難怪郭董今次要親統大軍，而且兵團仲包括上萬個機械人！
鴻海旗下富智康（02038）引入1萬個機械人整iPhone 6，叫「Foxbots」，每台價值2.5萬美元，Apple正係呢批機械人嘅首個客戶。
加上5.5吋iPhone 6要做到更輕更薄，接觸感應器同液晶體顯示合二為一，又採用藍寶石晶體製造屏幕表面，生產工序異常繁複，可想而知郭董有幾緊張。
其實，郭董緊張不無道理，因為iPhone 6係大眾期待嘅「大芒」版本，再加上又係首次由富智康機械人生產，如果呢批機械人生生性性嘅話，鴻海以後就唔使驚因為請唔到工人而頭痕啦！
余絲韻