財經頻道CNBC周三舉辦對沖基金論壇，請嚟有「股壇狙擊手」之稱嘅艾肯做席上客，仲請埋同佢素來有牙齒印嘅另一著名對沖基金經理阿克曼做神秘嘉賓。
當阿克曼喺艾肯嘅小組研討會尾聲時徐徐步出台前，現場觀眾都甚驚喜。兩鱷相遇，表現大方，互相擁抱打招呼，完成世紀一抱。
艾肯同阿克曼喺康寶萊風暴中打對台一事，大家都應該記憶猶新，舊年一月兩人仲為呢件事喺CNBC一個直播節目度爆發口水戰。事隔超過一年，兩人關係有所緩和，CNBC特登請兩人同台化解干戈，仲為呢個歷史時刻做咗件T恤送畀兩位主角，T恤正面寫住「阿克曼和艾肯團圓」（Bill and Carl reunited），背面寫住「感覺非常之好」（It feels so good）。
事實上，艾肯同阿克曼都以維權投資者著稱，兩人難得同台，口徑一致咁話維權行動對改善企業具有重要作用。
不過，當主持人問及康寶萊一役鹿死誰手時，兩位股壇對手仍擦出小火花，沽空康寶萊嘅阿克曼自信滿滿咁話係自己，仲希望艾肯退股。相反，艾肯話對入股康寶萊感到自豪，至今未沽一股。
無論如何，兩位大鱷表現大方，令絲絲明白股壇上輸贏都係尋常事，最緊要唔好輸品嘛。
余絲韻