絲絲講場：三星李在鎔 帶頭Casual
早幾日喺美國愛達荷州太陽谷舉行嘅「Allen & Company峰會」，吸引到世界各地經濟界巨頭聚首一堂，場面認真墟冚。而最令絲絲Surprise嘅係，堂堂三星太子爺竟然着住件Polo恤行出嚟同蘋果公司CEO庫克傾偈，呢一身平民打扮真係令人覺得好新鮮。
着Under Armour幫老友
貴為三星未來接班人、現任三星副總裁嘅李在鎔，一舉手一投足都好受注目。但係李在鎔呢件外觀平庸嘅Polo恤，只不過係實用體育品牌Under Armour，喺美國只賣59.99美元（約465港元），似乎有失身份。
但據絲絲深入了解，李在鎔着呢件衫其實大有文章，事關Under Armour嘅總裁趙顯俊同李在鎔係莫逆之交，今次李在鎔着住呢件衫見庫克，擺明係幫老友宣傳，希望藉住「李在鎔效應」刺激件Polo恤嘅銷量。而美國財經頻道CNBC亦即時報道話，Nike今後嘅競爭對手似乎唔止Adidas，仲有Under Armour！
引入清涼裝束利工作
李在鎔篤定係三星集團李健熙接班人，市場都期待睇佢接手後嘅三星會有乜嘢改變，而三星集團最近就宣布提倡清涼商務裝束文化，咁樣唔單止節約能源，仲可以刺激員工喺更靈活嘅氣氛入面工作。
所以，三星電子今個月決定允許水原市工廠嘅員工喺周末同公眾假期着棉質短褲返工，而之後呢個措施仲可能擴大去其他廠。
睇嚟呢位三星王國嘅太子，準備帶領三星再創高峰之前，已經率先為集團引入一套簡單自然嘅穿着文化。
余絲韻