期指觀瀾：港股唔跟升怕跟跌

昨日早市期指見過23,620點全日高位後，午後回試23,402點，即市的0.5反彈阻力23,555點，好友午後先後兩次反擊，都受制於此，反映超短線淡友的決心是稍勝一籌。當然，昨日的牛皮悶局，未改筆者對後市緩步向好的睇法，手上好倉繼續等收成。

聯儲局主席耶倫出席聽證會，指部分社交網絡及生物科技股估值偏高，只係估唔到相關成分最高的納指，調整一日又當無事發生，隔晚美股恐慌指數VIX急跌至11水平，反映耶倫講話，大家齊當耳邊風。

港股今年大落後，加埋港匯呈強，實在無理由唔睇好，但作為揸住期指好倉等運到的好友之一，最擔心係一直唔跟美股升的港股，萬一美股掉頭，佢會跟住跌。隔晚S&P 500 Bullish Percent Index（姑且叫標普五百牛氣指數）升0.4至84.6，反映樂觀情緒主導。

過去三年，指數多次在84.4至90.2高位見頂，之後標普會出現短期調整，雖然話牛市莫估頂，但基於美股可能十分接近鐘擺盡頭，使筆者放心不下去買爆個倉。

John Mullen