近呢兩年國產手機抬頭，不時都見到有人唔再係揸住iPhone或者「三叔」（Samsung）。絲絲有朋友都換咗玩小米手機，尋日仲話七月尾又要再追過，原來小米嘅話事人雷軍喺佢個微博上面Post咗張圖，寫住大大隻「4」字，仲要寫話：「小米2014年度產品發布會，7月22日。」圖入面亦有一句「一塊鋼板的藝術之旅」。
絲絲啲朋友就猛咁估話嚟緊一定係出小米4手機，但亦有朋友估個「4」字應該係代表4G手機，而嗰塊「鋼板」就好可能係代表小米3S會轉用金屬邊框，又話可能會出小米手環，總之十個人有十一個答案。
絲絲就覺得雷軍今次係微博上面故弄玄虛，成功制造話題，市場策略上就好成功啦，至於小米下一樣新產品係咩，睇怕都要等到七月廿二日先揭曉啦。
余絲韻