大家有冇試過Send錯WhatsApp或者Email？絲絲就試得多，不過嗰啲都係無傷大雅嘅內容，唔覺意收咗嘅，都會一笑置之。但係堂堂大行高盛竟然Send錯Email，就真係唔講得笑，隨時會畀人告o架。
高盛早前委託嘅一名承包商，錯手將一封有客戶高度機密訊息嘅電郵，發送至陌生人嘅Gmail，高盛惟有搵Google幫手，希望可以阻止存取。Google點都要揸正嚟做，除非高盛獲法庭許可，至可以將電郵刪除。Google嘅立場好清晰，取消誤發郵件係無先例，Google要求高盛攞到法庭命令先會行動，費事開咗壞先例，高盛惟有照辦啦！
嗰一封誤送電郵原本係送去高盛「gs.com」，點知傳送去「gmail.com」，高盛話試過聯絡錯誤收取郵件嘅人，但唔成功，所以希望Google幫手追蹤相關人士。慶幸嘅係，Google話電郵未畀人打開過。高盛話事件可能影響多位客戶，但拒絕透露人數。
余絲韻