絲絲講場：冼國林新功夫 揸Segway傳菜
國藝娛樂（08228）主席冼國林功夫了得，扮鬼扮馬亦好得。早排佢帶咗一班影視同財金界好友，參觀西樵山國藝影視城同埋度假村，趁大家埋首狂吃之際，佢竟然揸埋架電動車Segway扮侍應傳菜，認真鬼馬！
冼師傅話因為度假村太大，所以佢就特登訂造四部Segway，畀遊客租用，方便大家四圍去。佢仲話，遲啲度假村會開間歐洲風情嘅露天餐廳，到時啲侍應會揸住架Segway上菜，快人一步保持食物熱度。
唔知係咪想試吓嗰部電動車嘅效果，冼師傅就親自踩住架Segway傳菜，佢就好玩啦，難為一班享用緊五星級度假酒店食物嘅財金界好友，畀佢嘅速度嚇親呢。
度假村有沙球場 超另類
冼師傅話西樵山項目都準備得七七八八，預計月底正式開業。除咗過千畝嘅影視城外，入面仲有個度假村，提供南美波沙球（Bossaball）場、五人足球場同埋密室逃脫等康樂設施。估唔到冼師傅仲識帶領潮流，開發另類活動。
絲絲嘅好朋友恒豐證券研究部董事林家亨都有去參觀，仲分享當中嘅體驗，佢話度假村好靚，環境好好，值得再去玩吓！
余絲韻