期指觀瀾：市底偏強續持好倉
昨晚歐洲央行議息以及今日美國假期關係，提早一日曝光的美國六月就業數據，影響好友先擱下攻勢，未有將已衝破重要阻力位的恒指再推上一層樓。昨日恒指得109點波幅，跌18點收報23,531點，主板成交565億元，即月期指日市收23,548點。
若非昨日午後淡友出多兩錢肉緊，下午一點回來測試好友底線，期指穿一穿23,500點落到23,496點，試了周三升市淡友午後的一個重要據點，否則全日期指波幅可能只係得100點左右。即市未能去到筆者建議可以部署入市的23,380至23,450點區域，但純以走勢而論，市底頗強。
今次破位追買，老實講，自己又唔多怕再一次跌入上落市陷阱。以去年十二月恒指從24,111點跌至21,137點，中期反彈最後一隻攔路虎，是0.764阻力23,409點，結果大市用整個六月成功突圍。
客觀因素，港匯強勢，前日港股以滬港通消息公布後最大成交破位，好友不似無的放矢，令今次突破可信性較高。
即使外圍真係有差池，破位不成再掉頭向下，一旦恒指短期再以低於23,409點收市，最多將23,500點開的期指好倉投降，輸極有個譜，反之扑中中期轉勢肯定和味。
John Mullen