坐擁七十幾億元，被指「水壓」過高嘅證監會，終於勁蝕啦！證監會年度交易徵費多得個市旺，升9.5%突破10億元，但係年度虧損就爆升9倍，勁蝕超過1.38億元，對於一直有「洩洪」壓力，被要求進一步減低、甚至暫免交易徵費嘅證監會嚟講，可能反而係好事，不過，導致見紅嘅主要原因，係嚟自薪酬支出。
證監會年報顯示，佢哋人工支出8.95億元，較對上一年多咗1.4億銀。喺呢個年度，直屬證監會員工753名，同比多咗85人，而證監會兩大巨頭、正副CEO歐達禮同張灼華都算識做，前者年薪減咗38萬去到903.1萬、後者只加14萬，到684.7萬元。
即係話，錢主要係加喺前線同新請員工度，而年度內執法行動亦確實明顯多咗，證監會成功打「烏蠅、老虎」都交到成績。
金融服務界議員張華峰都好公道，佢話依家個薪酬市況，人手同人工無辦法唔加，只希望證監會可以照顧中小證券行利益，研究再減徵費，同其他方法幫助刺激個大市成交啦。
證監會嘅盈餘儲備減少1.8%，到73.16億元，係開支嘅5.4倍。根據《證券及期貨條例》第396條，當證監會儲備超過該年度預算營運開支2倍，須提出減低交易徵費率或款額建議。
記得歐達禮每年喺立法會畀議員逼佢減免徵費，佢都回應減徵費會面臨赤字，今年開始又將0.003%股票交易徵費減一成至0.0027%，證監會預期未來12個月赤字再擴大至5.09億元。
余絲韻