由科網公司Bitculus向美國Robocoin引入嘅虛擬貨幣比特幣（Bitcoin）販賣機，已經殺入深水埗黃金商場，絲絲去現場八一八，聽商場入面嘅人講，部機已經放咗喺度成個星期，間唔中都有人行埋去吓，絲絲都見到唔少人對呢部販賣機好有興趣，又搞吓又影相咁，不過就無咩幫襯喇！
部機放咗喺部飲品售賣機旁邊，就咁睇真係好似部ATM，有中、英文兩種語言顯示，絲絲親身試過，發現要登記帳戶要做好多步驟。
首先，要入手提電話號碼，之後就會收到認證碼，輸入之後要讀取手掌紋、身份證同埋個樣，搞成五分鐘先可以完成登記，而販賣機亦會出現買賣比特幣嘅價錢，而屏幕顯示，尋日比特幣嘅買入價格大約4,988元，而賣出價就4,465元。Bitculus負責人同絲絲講，目前呢個階段只係試行，正式會喺星期五推出，到時會再示範點樣用。
喺附近做嘢嘅陳生講，之前有聽過比特幣，但係就唔係好清楚點解會升同跌，不過佢都登記咗帳戶先，話如果比特幣真係普及先會考慮買。絲絲又見到位男士，專程嚟到話想了解吓部機，佢話自己已經有比特幣，仲話雖然無金融機構監管，但都唔擔心，因為都好多地方流行。不過有商舖負責人就話，唔會接受比特幣畀錢囉。
余絲韻