絲絲講場：基金獨行俠一個人賺晒
所謂「輸人唔輸陣」，有啲基金公司有成百人嘅Team支援，David Abrams旗下嘅基金公司Abrams Capital Management LP，員工一隻手數晒，80億美金一個人話晒事？唔怪得Abrams個頭有啲禿啦，可能壓力真係太大啦。
五年幫客贏過億
David Abrams為人低調，同一般成日上電視嘅基金經理好唔同，佢從來都未試過喺公眾場合發表演說，佢甚至希望大家搵唔到佢。正常一間擁有咁上下資產嘅公司都會有過百個員工，佢間公司就淨係得三個分析員，同一班後台員工，而每單交易都需要Abrams點頭同意先得。
得咁少員工仲要咩都自己話晒事，唔通Abrams真係以為自己有三頭六臂？
人力就係單薄啲，但近五年佢幫投資者賺咗過億，仲令自已做埋億萬富豪。公司由九九年成立到依家，旗下主要基金錄得平均每年15%嘅回報率，係標普500指數嘅三倍。華爾街日報幫佢計過，舊年佢一隻主要基金嘅回報率就達到23%。
一個單靠自己就可以游走於華爾街呢個金融世界，仲可以創造出巨額嘅財富，你話唔係「華爾街獨行俠」係咩呢？
余詩韻