絲絲講場：煤氣富貴餐盒餵飽股東
公用股穩穩陣陣又派息高，唔少投資者都好Like，每次去呢啲公司嘅股東會，都有逼爆感覺。尋日中華煤氣（00003）舉行股東會，吸引咗成千六個股東參加，「賓墟」咁嘅場面，絲絲聽煤氣老友講，近年嚟股東會嘅股東愈來愈多，今年仲係最多人嘅一次，無他嘅，對股東好，自然多人支持！
希望繼續送紅股
股東一場嚟到，主人家總會有啲嘢食慰勞吓班股東，而煤氣尋日就準備咗個餐盒，齋睇外型已覺精美，內涵仲好得添，蝦餃燒買呢啲基本嘢一定有，睇真啲，仲有燕窩蛋撻同埋鮑魚海鮮酥，絲絲睇到哇哇聲，唔怪得股東個個相當滿意啦！
不過最好嘅，當然唔係嘢食咁簡單，舊年煤氣就繼續每十股送一紅股，有小股東就喺會上問以後集團會唔會繼續派紅股，主席李兆基就話，「送咗幾年，希望能夠繼續送。」而管理層就補充，如果可以，盡量會派發紅股，但係就唔可以保證喇！
余詩韻