Market Insight：彩票股借勢落鑊

睇番內地投資者，今次比香港更悲觀，「定向降準」之後，滬綜指連跌兩日，昨收報2,024點跌13點或者0.66%，內地股市認為針對三農及小微企業的降準措施「唔夠力」，如果滬綜指再朝着2,000點的心理支持進發，可以預期港股短期要突破21,500至23,500點上落區的機會唔大。

身邊唔少炒家朋友已索性提早收爐，疊埋心水睇波，或者趁暑假前同家人外遊共聚天倫，六月上旬港股怕愈玩愈縮。

古勝冇點你2014/06/05

萬里長空

本地四月零售數據因為珠寶金飾銷售急跌，錄得9.8%跌幅，昨本地零售股走勢冷靜，只有米蘭站（01150）跌7.6%，周生生（00116）、六福集團（00590）微跌1%及0.5%，周大福（01929）倒升2.5%。珠寶首飾股經過今年初的跌浪，似乎低廉的估值已吸引到一些捧場客博反彈。

領匯短線仍有水位

內地旅客消費見頂，其實對本地零售業都不是沒有好處，當然所指並不包括主打遊客生意的公司，過去幾年租金狂升的日子不復再，租客一旦議價空間增加，可以預期像大家樂（00341）、大快活（00052）、翠華（01314）及CEC國際（00759）旗下阿信屋等連鎖零售及餐飲服務提供者，將具有利條件控制未來租金成本。

最近阿信屋轉攻凍肉、化妝品，仲話去深水埗開雲吞麵舖，執行能力得唔得要等時間證明，但野心之大卻是路人皆見。自問穩陣，古勝認為最先應該睇番兩隻估值較低的「大」字頭快餐股。

遊客減少，最不受影響之包租公是主打屋邨商場的領匯（00823）。剛公布截至三月底止物業收入淨額升12.7%至52億元，可分派收入38.3億元升14.3%，每基金單位末期分派85.52仙，升13.4%。

由於投資物業公平值增加134.45億至1,098.99億元，等於每基金單位41.69元升16.8%，亦因此資產負債比率降至11%，同REIT code限制的45%有距離，意味就算唔計賣掉四個商場套現的12億元，領匯如果肯提升債務至貼近上限，最多可以進行300億至350億元的收購。現價往績回報3.91厘，在下估計短期有一成左右上升空間。

生活無憂至講投資

在煤氣（00003）股東會上，四叔再一次話買樓收租不如買股票。而講開買樓，朋友之中有樓無樓各佔一半，眼見海嘯後，香港樓價愈升愈有，無樓一批近年愈睇愈有反資本主義傾向，個個唔係想再一次爆發金融海嘯、沙士疫症，就係深信美國退市，香港樓價兩年要跌五成。

有趣係，唔單止有啱啱畢業，搵萬多元一個月財力未豐的年輕人，更多是投資銀行及私人銀行家，千萬年薪，情願每月花十萬八萬租樓，話要等樓價爆煲至買。

上世紀九十年代在下投身社會，見識過九七、經過沙士時淘大花園80萬賤賣。老實講，有朝一日，如果樓市真係崩塌，古勝敢寫包單呢批朋友一樣唔會買，原因一來係信心盡失；其次份工未必保得住，點供！

如果聽真啲，四叔話買股票好過買樓收租，唔係「買樓自住」。咪話在下古板，衣食住行是生活基本需要，個個月白交租，未有自住物業，學超人話齋，負擔得起其實買樓係一啲問題都無，至少大家唔可能買幾手恒地（00012）搬入去住，銀行亦唔會用低至按揭的利息，借錢你買股票，第一層樓係market netural，有能力買到第二層，先至真係投資樓市，到時先去煩買樓、買地產股抑或買REITs吧。

炒消息轉身要夠快

本月世界盃開鑼，講到「賭」字，中國人最有興趣。內地福彩、體彩玩法甚多，近幾年官方努力打擊地下彩池，並逐步改革彩票市場，引導投注額由黑池轉歸合法彩池，去年全國投注額超過3,000億人仔，未來仍有望維持較快增長。

呢期世盃熱，彩票股又乘機炒一轉，昨日傳來華彩控股（01371）股東擬引騰訊（00700）入股，刺激股價以全日高位0.81元收市，升幅17%，成交超過10億元。不過，記得騰訊入股華南城（01668），公布交易前未有洩露風聲，今次華彩的傳聞可唔可信？反正炒還炒，記得轉身要夠快，隨時都要有落車準備，以防接火棒！

古勝