美國聯儲局員工雖然肩負起穩定國家貨幣供應嘅重任，但佢哋嘅個人財務情況就反而唔太可靠喇。於是市場就揶揄聯儲局員工要佢哋放水就最叻，但係要佢哋交稅就只會拖囉！
根據美國國稅局發布嘅數據，聯儲局1,873個員工喺舊年九月三十日滯納稅款總共33億美元，比例為6.51%，比前年升2.6%，欠稅率幾乎係所有聯邦政府僱員嘅兩倍。
數據顯示，聯邦僱員同退休人員欠稅比例為3.27%，相較之下，整體美國人口欠稅比例至少8.7%，所以聯儲局欠稅率喺政府內部雖然比較高，但相比一般美國納稅人都係較低嘅。
另外，規模較細嘅單位欠稅比例較高，其中美國民權委員會（U.S. Commission on Civil Rights）有9.52%，美國官箴局（Office of Government Ethics）就有7.69%。
聯邦政府之中，美國財政部遲交稅嘅比例就最低，只有1.2%。聽聞財政部員工受制於更嚴格嘅罰則，其中包括蓄意不實報稅將會被炒，所以員工都比較聽話，準時交稅。加上，美國財政部轄下有國稅局等機構，既然自己都有份負責稅務，捉得嚴啲都係合理嘅。
余絲韻