絲絲講場：宋衞平賣盤有賭味
綠城（03900）包括主席宋衞平在內嘅三個股東終於落實賣出部分股份畀融創（01918），絲絲對於呢單交易就有一大堆問號。尋日兩間公司嘅高層喺杭州開咗個記者會，向包括中港兩地媒體解畫，對於有人爆料話宋總之所以要賣盤係因為爛賭，所以先要賣走自己嘅心血綠城，宋衞平話呢樣只係佔賣股原因嘅1至3%。
宋總話，自己唔係賭場上嘅勝利者，認為賭博只係人生多種娛樂嘅其中之一，不過喺未退休之前，都唔算係快樂嘅旅遊者，所以就先話呢個因素只佔1至3%。
願將球隊交馬雲
佢又提到，以後佢負責的包括養老、代建及農業嘅非上市公司業務就會加埋一齊，改名叫「藍城」，因為自己喜歡藍色，而比重大概佔上市公司嘅四分之一至五分之一。他相信「藍城」未來一定會超越融創，不過佢都唔好意思咁講，「啱啱將綠城交畀老孫（融創主席孫宏斌）我馬上就要超過他，這不太好，三年內不說這個話。」
至於綠城足球隊方面，市場都關注宋衞平會唔會賣畀分屬同鄉嘅馬雲，宋衞平只係笑住咁話，願意將球隊都交畀佢，到時就有好多外星人嚟踢波喇！
余絲韻