中國科網新股接連在美國上市，其中兩位CEO更係身價過億嘅超級筍盤，講緊嘅就係內地最大嘅化妝品電商股「聚美優品」嘅創辦人兼CEO陳歐同京東CEO劉強東。聚美上個禮拜五喺美國上市後，陳歐成為咗史上最年輕嘅紐交所中國企業CEO，今年得31歲咋。
講到年輕有為，八十後嘅陳歐絕對係佼佼者。佢喺四川出生，先後留學新加坡同美國，讀過番書莫非真係唔同啲？
陳歐喺27歲創立「聚美優品」，瞬間就成為咗行業嘅領頭者，仲得到紅杉資本嘅賞識，批咗過千萬美元投資。而陳歐就喺短短兩年後打入咗《福布斯》嘅創業者榜，上市之後個人身家已經高達13.6億美元，即係過百億港紙，更加重要嘅係名草尚未有主喎，一眾單身女士真係要把握機會喇！
另外，尋晚京東喺美國上市，但對一眾靚女嚟講可能係神傷嘅一晚，皆因身家超過46億美元嘅京東老細劉強東會向傳聞中嘅女友「奶茶妹妹」求婚。雖然之前兩人喺美國拍拖照流出，女士們已心知不妙，況且男才女貌無可厚非。嘆息驟失筍盤之餘，女士們亦應檢討策略，點樣先可以喺尚餘不多嘅IT才俊中抽番支好籤。
余絲韻