Market Insight：創維數碼前景堪憂

昨日兩隻掛牌新股，街外IPO大約只有三分二貨有人認頭的中國北車（06199）收5.09元，比招股價5.17元潛1.5%，牽頭的瑞銀睇嚟有點功架，不過趁深潛前最好仲係走人。另一隻得1,000萬股攞出嚟比散戶抽下，最終超購428倍的碧瑤綠色（01397），收報1.24元比招股價1.2元高四格咁大把。都係嗰句，市靜都係避玩新股為上。

內地傳媒引述，國務院發展研究中心宏觀經濟研究部副主任任澤平認為，世界經濟緩慢復甦帶動外部需求回升，可是內需不足，影響中國未來兩三年GDP增長速度，回落至5至6%之間。短期而言，今年第二季GDP應該同第一季的7.4%相去不遠，但第三季會再回落，全年得7.2%。

古勝冇點你2014/05/23

萬里長空

如果任澤平預測準確，意味今年GDP極有可能低過中央的7.5%目標，兩三年後GDP更低見「五字頭」。古勝認識的賓架，其實唔少都有咁悲觀的睇法，只係國策難測，無人敢講到出口，今次有官方放風，似乎看官們都好應該為內地經濟進一步放緩做好心理準備。

燃氣股逢回吐吸納

中俄兩國達成天然氣供應協議，中國天然氣集團同俄羅斯天然氣公司Gazprom簽訂30年的供氣協議，一八年開始，每年向中國供應380億立方米天然氣。

由報道指協議涉及4,000億美元，有證券行已經計過數，每立方米成本大約係2.2元人仔，同現時內地從土庫曼進口管道燃氣價格差不多，考慮供氣管道成本，應該比現時內地氣商的門站價每立方米大約2元人仔高些少，大家可以預期，未來幾年內地氣價好大機會繼續上調以填補缺口。

昨日燃氣股全線做好，主要係芬佬睇重協議差不多等於中國目前向外購氣總量四分之一，長遠減低對單一國家的供應依賴，穩定長遠供應，對幾間各自完成搶佔「山頭」的大型管道燃氣商業務發展有利。不過，短期好消息出晒，近兩三星期又升咗唔少，捧場客或者可以等等，心水有中國燃氣（00384）及新奧能源（02688），長遠依然係逢回要買。

對手搶灘以本傷人

創維數碼（00751）發盈警，股價插7.6%收3.49元，同52周低位3.39元一步之遙。公司指今年三月底止業績倒退，主因去年五月節能補貼政策到期，中國市場電視需求疲軟所致。

逐個月睇番佢銷售數字，其實盈警唔意外，去年八月至今年二月的七個月，創維的電視機付運量都錄得按年跌幅，就算係海外，由舊年八月開始都有六個月付運倒退。截至去年九月止中期，創維盈利仲有26.4%增長賺7.19億元，全年出現倒退，可以想像下半年倒退幅度會好大。

創維上半年度仲撐得住，主要靠高端4K超高清電視增長，抵銷部分2D的液晶電視銷售及毛利率下跌壓力。近期樂視（LeTv）、小米等有私募基金水喉射住，大把彈藥玩割喉減價的公司，開始染指4K網絡電視市場，由京東網站，創維50吋4K賣緊5,199元人仔，小米啱啱推小米電視2（49吋），賣3,999元人仔，樂視仲離譜，50吋新機賣2,999元人仔（雖然要畀多980元作為二十四個月網絡電視內容供應費）。

現價創維業績如跌兩成，PE 4.8倍係平，但依家咁多對手以本傷人，生產電視毛利率向來低，創維亦不過18至22%左右，對手賣價居然平兩成三，點玩呀。

環保板塊有「績」可尋

發改委話擬引民資入光伏、水電等項目，竟又成為炒家動身藉口。信義光能（00968）最標青，股價急升13%，收報2.16元；保利協鑫（03800）進一步確認收復250日線，收報2.54元，升6%，水務股亦普遍高收。究竟環保股同新能源股股價調整是否經已完結，相信上半年的業績表現可以提供答案。只要企業業績不差，股價唔難翻身再炒。

究其原因，祖國要實現「十二五」的節能環保目標，今明兩年就必須要千方百計扶持這些行業發展。眼前整體經濟增長減速，大家搵錢機會係少咗，但對推動大氣治理及環境保護，確是事半功倍，這些板塊有國策支持，只要企業交得出成績，長線仍不愁捧場客。

古勝