Market Insight:中資股有排無運行

上周內地A股日均開戶人數跌至1.3萬,創○七年有紀錄以來最低。睇番四月數字,1.74億個A股戶口中,持貨戶得5,364萬個,換句話接近七成係股票倉養老鼠的殭屍戶。咁環境,爭論2,000點到底係咪政策鐵底已經意義唔大。自○七年十月滬綜指見過6,124點之後,這全球第二大經濟體股市,簡單講係無段好睇。

今年更加係衰到無朋友,年初至今滬綜指五次下試2,000點關口,包括昨日的1,996點,雖然收市死唔去,跌21點,最後收報2,005點,但睇番今年觸及2,000點後的反彈,確實係一次弱過一次,2,000點似豆腐底多啲。

滬綜指過千隻股份中,古勝認識的恐怕唔會比看官多,頂多佔3至4%左右。昨日做籠統計算,篤機睇滬綜指股份的綜合市盈率為9.7倍,唔使講都知係歷史新低。

不過,低過9.7倍PE居然只得96隻(仲未減去一次性收益令PE扭曲的股份),佔一成都唔夠,意味少部分巨型上市公司,貢獻指數權重大部分盈利(主要是內銀及國家石油公司)。合理的推測,其他九成未必像市場想像般便宜。

內地樓市燶味漸濃

事實上,全球最賺錢幾間銀行,都屬於阿爺轄下的國有銀行,同時在A與H股市場上市,香港魚缸上,5、6倍市盈率一樣無法引起芬佬之胃口,說明當基金經理齊齊唔信盤數係真嘅時候,市盈率已失去比較股份估值高低意義,內銀股係咁,A股亦然。

到底A股及中資股的信心催化劑幾時至出現?始終要睇阿爺容忍度可以去到幾盡,領導人話要容忍較慢的經濟增長,「克強經濟學」提出放棄粗放型經濟,重質不重量,假如真係堅持唔行4萬億元人仔基建舊路,兼唔肯放水,可以想像個市要衰幾耐有幾耐。

不過,古勝未完全死心,事關睇見周末國統局公布四月份全國70大城市新盤銷售價格,得44個按年仲有得升,比三月56個少12個。五‧一黃金周新盤銷售災情嚴重,五月份數字九成九會繼續惡化。上周央行會議上,似乎中南海聞到樓市燶味愈來愈濃,在會上指示15間商業銀行要保障首套房貸,但實情係內房股在消息後一彈完又再散過。

六月世盃股市更靜

一來係今次純粹出口術,並非強制性救市政策,客觀環境,阿里巴巴旗下的餘額寶過去一年搞到內地銀行頭都痕晒,最近有銀行出到5.5厘的理財產品留客,最好佢哋真係有咁筍貨幣基金可以搵到這樣高回報,而非為留客「硬食」畀高息,否則銀行息差內傷之餘,更加唔會有興趣用5.5至6.5厘,幾乎是資金成本價借錢畀買樓的業主。

中央話頭號敵人是環境污染,但在下認為真正挑戰仲係愈調愈升的樓價,一四年第一季,內地樓市好可能出現一個三至四年周期的高峰。未來內地樓市愈差,意味距離開水喉的日子會愈近。不過,準買家見債台高築的發展商,待售單位(上月3.49億平方米創新高),最終得劈價促銷一途,「等跌先買」心態一旦形成,要托市也殊非容易。今次中央點樣拿捏,大家等睇好戲。

查實近月內地地方政府各自微調樓市調控措施,但收效唔明顯,外資行估計第一季GDP偏離7.5%目標唔遠,政府有條件等埋第二季經濟數據先決定點做,即係等到七月中旬之後。

股市往往比經濟走得更前,碰正今年六月,又撞正世界盃傳統股市淡季,六月可能港股更加靜局,押注政策市拐點,睇嚟較大機會在決賽日(七月十四日凌晨),知道冠軍誰屬前後兩星期的時間。

第一視頻確唔易炒

早前手遊股熱炒,唔少相關概念股股價升幅都以數倍計,但第一視頻(00082)表現相對失色,其中一個原因係旗下海外上市的中國手遊業績未交到成績,班對沖基金寧願大炒股價冇包袱的新股,都唔願意炒作第一視頻。以本月上旬第一視頻股價低見0.63元計,已回落至去年末季的起步位水平。

不過,昨日該股成淡市奇葩,股價急升兩成,以全日高位0.81元收市,成交大增至1.63億元,原因係旗下中國手遊公布季度業績虧轉盈,加上有傳聞指世界盃前內地或發出互聯網彩票牌照(第一視頻亦經營彩票相關業務)。

整體手遊股的熾熱氣氛已成過去,睇見其他龍頭股表現只係一般,現成彩票股亦不乏更好炒之選,故短線跟炒第一視頻宜注意風險,最怕又突然停車熄匙!

古勝