絲絲一向觀察力異於常人，好似發覺今年至今，大大話話有十五間國際公司靜靜雞改咗公司Logo，改得好定唔好就真係見仁見智，但當中改新Logo背後一定有佢嘅深層意思，咁大間公司唔會冇的放矢。
好似紅茶品牌Lipton茶包前排都喺facebook發布咗新Logo！同舊Logo睇落其實勁似，主要將Lipton英文名稱字體做咗啲調整，睇落會young啲，不過絲絲就覺得新Logo整體上望落同Lay's薯片嘅Logo似到十足，唔通內裏有乜玄機？紅茶搭薯片，又幾搭喎！
絲絲亦察覺到，Paypal近期都改咗Logo，兼且係公司自○七年以嚟首次更新其品牌形象，改Logo自然係當中重要一環。據知今次Paypal公司特地請嚟名牌設計公司fuseproject操刀，首先繼續由公司最具代表性嘅雙P，同埋顏色來着手，新Logo主要由兩個顏色深淺唔同嘅斜體「P」重疊，象徵人與人之間嘅連結，下面仍然有一行Paypal字。Paypal嘅新Logo着重反映PayPal簡單、便捷同埋安全嘅理念喎！
另外，老牌汽車品牌Cadillac嘅Logo過往其實改過無數次，今次新Logo改動得幾大，無咗原先圍繞住Cadillac車牌嘅桂冠花環，可謂十幾年嚟最重大嘅改動。睇落又確係簡潔咗好多，兼且現代感強烈！
余絲韻