阿里巴巴主席馬雲出咗名顛覆傳統，當綠城老闆宋衞平確認馬雲可能入股綠城足球，網民隨即熱議，仲建議杭州綠城可改名為杭州淘寶、杭州天貓、甚至杭州阿里，但絲絲請大家先冷靜，宋老闆話馬雲只係入股49%，即係綠城仍係姓『宋』。
有心水清朋友話宋老闆早前已透露玄機，佢話未來會有好嘅企業介入綠城控股，一齊搞好浙江足球。宋衞平當時所謂嘅「好嘅企業」，依家揭盅原來係阿里嘅馬雲。究竟馬雲點解突然想搞足球呢？
當然錢對馬雲嚟講唔係問題，但關鍵在於邊個去說服馬雲投資足球隊，喺絲絲打聽下，原來幕後第一推手係恒大老闆許家印。
許老闆其實早有先例，當初富力進軍足球壇，都係佢說服富力老闆張力，家陣富力同恒大每次「廣州打吡」，許家印同張力都打埋牙骹戰。
據講，許家印同馬雲交情唔錯，佢哋喺舊年下半年一次會見，兩人惺惺相惜，馬雲話好佩服許老闆咁短時間將恒大足球搞得有聲有色，仲攞埋亞洲冠軍球會杯，其後阿里喺舊年九月同新浪網打咗場足球友誼賽，馬雲仲親自為比賽舉行開波儀式添。
余絲韻