四年一度嘅體壇盛事世界盃下月開鑼，球迷自然金睛火眼，散戶更要睇實世界盃概念股嘅走勢。講到體育用品股就不得不提特步（01368），主席丁水波都知世盃足球熱潮機會難逢，所以一早準備好相關嘅營銷活動同埋推出相關產品應市。
特步可以話係幾間體育股中，少有出錢出力以足球為體育營銷焦點之一，贊助中國大學生足球聯賽兼多支中港同海外球隊，包括西甲勁旅維拉利爾。聽講特步贊助嘅香港球隊標準流浪就快同華倫西亞喺本港有賽事，食正世界盃熱潮，到時特步就可以大收品牌宣傳之效。
繼上屆世界盃之後，特步今年亦都打算帶客戶、銷售商去巴西睇世界盃，不過丁水波就叫絲絲放心，今年公司推廣費只係同舊年差唔多。問開世界盃，丁水波有無冠軍心水呢？佢就笑笑口話，歐洲嘅西班牙隊就係佢心水冠軍大熱。絲絲細想，咁咪即係冧莊？
余絲韻