中國證監會主席肖鋼突然宣布缺席嚟緊嘅內地證券商創新大會，臨急臨忙推咗副主席姚剛代為演講。堂堂主席連續兩年臨時「甩底」，真係潑咗一眾內地證券商一頭冷水。
肖鋼由上年三月開始擔任中證監主席，平時低調謹慎，但大家都知其實佢對市場改革有自己一套宏圖大計。佢缺席大會嘅消息一傳出，都即刻嚇親一班投資者，券商股尋日亦即時震一震，部分跌逾3%。
其實佢缺席創新大會都已經唔係第一次，上年佢啱啱接任證監會主席一職，就因為未有心理準備所以拒絕出席五月嘅大會，仲一早講明連六月嘅陸家嘴論壇都唔去。上年新官上任就話大條道理唔撐場啫，今年大家都好期待佢喺創新大會上亮相，點知臨門一腳，佢又一次令大家失望。話佢係「缺席」主席，真係完全無誇大呀。
睇番上一屆嘅主席郭樹清，就曾經喺一二年親自率領多個高層出席創新大會，可謂畀足面子，而肖鋼就完全相反，連續兩年玩缺席，唔通肖鋼覺得少蒲頭先至顯得矜貴？
正當絲絲都覺得肖鋼主席為人過於低調之際，就發現原來中證監尋日啱啱發布咗《關於進一步推進證券經營機構創新發展的意見》，從細則睇，中證監鼓勵證券經營機構探索新型互聯網金融業務，支持自主創設私募產品，中證監仲會放寬行業准入，支持民營資本、進一步放寬證券經營機構外資准入條件。哦，原來肖鋼主席要講嘅證券業創新都已經講得清清楚楚，出席唔到之後嘅券商創新大會，都有晒交代囉！
余絲韻