三星電子主席李健熙入院消息傳出，接班人誰屬唔只係財經界嘅焦點，一眾單身女士更加心急想知，皆因傳聞中嘅接班人大熱，佢係現年45歲嘅獨子李在鎔，有型、有錢兼單身，仲唔係筍盤？
南韓傳媒對呢位「三星皇太子」認識並唔深，皆因佢本人比較怕見傳媒，亦冇玩Twitter，但可以肯定嘅係，○九年初高調跟同為財閥後人嘅前妻離婚後，估計坐擁50億美元（逾390億港元）身家，係不折不扣嘅鑽石王老五。
論學識，李在鎔同樣「冇得輸」，除咗識講流利英文同日文外，仲分別喺日本慶應大學同美國哈佛大學獲得工商管理碩士同博士。寫到呢度，絲絲不禁有感，話唔定風靡萬千女性嘅《來自星星的你》男主角「都教授」就係咁樣煉成，都教授叻極都係兩粒星，李在鎔三星喎！
至於工作上嘅李在鎔又點呢？有三星員工話，文靜有禮嘅佢其實內裏好堅強，做刁「不到黃河心不死」，而且好有遠見，識得跳出框框思考，前排就同日產、豐田、福士、寶馬等大車廠嘅高層會面，睇吓喺電池、螢幕方面有冇合作機會，又或者等以上牌子汽車嘅導航系統連接到用三星智能手機。
除此之外，李在鎔近年仲要同企業領袖、以及中、美兩國嘅政治家見面，祈求打好關係，舊年Google舵手佩奇去首爾拜訪總統朴槿惠嗰陣，亦被李在鎔帶咗去參觀可屈曲螢幕等三星當時研發緊嘅科技。不過，據聞李在鎔仍然會抽時間親自覆電郵，間中亦會騎吓馬同打吓Golf。
余絲韻