歐元持續調整

上周歐洲央行議息,息口無變動亦無咩驚喜,但央行行長德拉吉始終擔心歐元過強嘅問題,怕匯價太高會打擊通脹之餘亦打擊經濟,於是一於出口術,暗示可能會在下個月就推量寬措施,而減息方面亦都持開放態度,市場亦都畀面,大家估央行條底線係1.40,於是都唔敢推上去,去到1.3998就回頭。

消息對歐元不利,但對歐股有利,相信下個月之前市場對量寬預期持續,歐元仍難以大升,1.3750第一個目標已到,短線歐元繼續調整機會高。

雖然係咁,但同一時間美元又未有條件大升。美匯指數橫行咗半年,時間上隨時準備好突破,暫時睇向下突破機會高,惟基本因素筆者睇好美國復甦動力強過其他國家,唔敢對美元睇得太淡,建議讀者都係留意番美匯79至81.70區間,突破區間先暗示有單邊行情,否則繼續上落市橫行機會高。

資深外匯市場人士 陳健豪