Market Insight：地產股靜靜起革命

由於美國網購股亞馬遜（Amazon）發出淡淡哋的營運指引，網絡及手遊股一仆一碌，股王騰訊（00700）昨跌2.8%，收報508.5元，三隻半新股亦無一幸免，IGG（08002）跌14.5%、雲遊控股（00484）跌8.2%，博雅互動（00434）跌6.9%。「雙馬」概念股中信21世紀（00241）及華南城（01668）分別跌4.4%，芬佬個個都要錢唔要貨。

今日期指結算，成個四月簡單講係得個「做」字，指數還原基本步。昨日較三月底22,151點微跌緊19點，最攞命仲係中間有滬港通消息，四月十日以1,069億元成交額，炒咗個市上去三個月高位23,224點，當日急增的成交，多少來自基金大戶或者普羅散戶？無人知，可以肯定係綁咗一批蟹貨在23,000點樓上。

古勝冇點你 2014/04/29

萬里長空

資金停泊舊經濟股

後市會唔會返到三月下旬低位21,137點？上星期有大行報告，指上周資金流已經出現成熟市場及醫療板塊回流新興市場的趨勢，睇落今次跌市，與年初港股就新興市場撤資潮跌浪有所不同，中港股市弱勢，純粹因為外資對中國經濟前景審慎所致。

內地本土投資者又驚緊五月重啟IPO踩多一腳，不過，觀乎港匯昨日企住7.7527，貼住今年高位，資金無外流迹象，睇怕大市短期都仲係上落市格局居多，即使外圍氣氛再差，中短期恒指未必需要跌穿21,000點。

昨日相當明顯係基金換貨，繼續質新經濟股，買番舊經濟股。恒指領袖股有中移（00941）、聯通（00762）、中海油（00883）同中石油（00857），仲有係幾隻近期靜靜起革命，未有跟隨大市向下的本地地產股。在聯儲局主席耶倫再三澄清，美國未有耐需要加息之下，十年期美債息在2.7厘徘徊，未有再試邁3厘高位，一些收息公用股走勢都好番唔少，中電（00002）、電能（00006）、煤氣（00003）及長建（01038）都見逆市做好。

新世界投機價值高

古勝已多次提出，地產股再跌幅度有限，只係未知幾時會再獲基金垂青。雙辣招下，香港樓市被冰封一樣，但睇番恒指地產分類指數，其實早於○七年見頂之後，已經無跟住樓價再創新高，目前平均市帳率只係0.7倍，三成的折讓可以反映特區政策風險、樓價可能要跌一至兩成的預期，或辣招下樓市成交由以往每月1萬至1.2萬宗跌到4,000至5,000宗，發展商售樓量減少的問題。

不過，近二十年本地地產股市帳率大致在0.6至2倍之間上落，目前水平，與九七年及沙士時低位僅一步之遙，以今日經濟情況，種種負面因素已經充分甚至過分反映，問題係特區政府無形之手，幾時先會撤出市場。

今年地產分類指數跌2.4%（恒指跌5%），五大地產股長實（00001）升10.3%，信置（00083）升8%，恒地（00012）升1.9%，新地（00016）跌1.8%，最差係供股拖累的新世界發展（00017），一度跌逾一成，也是古勝認為投機吸引力最高的一隻。新世界的0.37倍市帳率，較十五年歷史平均0.57倍折讓35%，最理想，當然係博佢私有化新世界中國（00917）被否決，供股變減債就最理想。

重機股未到撈貨時

雖然眼見內地首季經濟增長放緩，中央並不怠慢，公布多項微刺激措施，鐵路基建開綠燈，又放聲氣擬重啟核電項目審批。之不過，對重機股而言，似乎股價尚未步離寒冬。好似三一國際（00631），昨日以全日低位1.82元收市，似乎52周低位1.67元有點危危乎；中聯重科（01157）亦唔好得去邊，昨日收報5.02元，與52周低位4.74元亦相距不遠。

事實上，基建相關項目的利潤率有限；至於房地產項目，利潤率相對高，但中央持續調控樓市，房企因應資金流轉放緩減慢發展步伐，致使整體行業景氣仍未有明顯改善。盈利前景未明，難怪股價弱勢難改。看來次季相關股份股價再次穿底機會不低，策略宜待技術指標出現嚴重超賣，始留意短線博反彈機會。

古勝