Market Insight：維達短期整固完成

若非善忘，美國經歷惡劣天氣影響下，一、二月就業數據差強人意，市場亦因此更為睇好三月非農職位增長可重上20萬個樓上，結果得19.2萬，到底退市對實體經濟影響係咪比預期更早浮現，單睇近期十年美債息無意再戰3厘樓上，在2.7厘左右牛牛皮皮，可見債商同意聯儲局所講，退市後，息口仲有一段時間先回升的預告。

滬港通消息炒得短癮，港股又再陷入泥漿摔角的牛皮悶局。昨日大市得114點波幅，恒指收報22,562點升53點，主板成交縮至503億元，下周二結算的四月期指日市收22,543點，五月期指因為藍籌除息影響242點的關係，日市收報22,320點。

古勝冇點你 2014/04/25

萬里長空

TCL兩公司天與地

收市後幾份首季業績出籠，中石油（00857）首季少賺4.9%至342.48億元人仔，主要受產量放緩及國際油價偏軟影響。中國銀行（03988）賺453.63億元人仔，按年升13.8%，高過市場預期，主要係淨息差回升7個點子至2.29厘，手續費及佣金收入有勝預期增幅所致。

TCL多媒體（01070）首季業績大跌92.2%至1,519萬元，舊年政府家電補貼告終，影響在今次季績中表露無遺。內地LCD電視銷售按年大跌29%，股價由去年五月初高位7.28元，至昨收市價2.98元計，累跌六成，跌夠未仲要睇第二季高端電視產品銷情會否好轉。

同系的TCL通訊（02618）受惠於內地智能手機銷情火熱，首季虧轉盈賺1.77億元，對比去年蝕2.46億元大幅好轉，符合早前的盈喜預告。首季手機及相關產品銷售1,360萬部升60%，當中智能終端銷量佔630萬部，增幅3.34倍，平均售價升至52.2美元，毛利率由16.4%升至19.6%，今年主打4G LTE產品，管理層將銷售目標增幅由35%提高到45%。

同姊妹公司TCL多媒體相反，去年五月至今股價累積勁升兩倍，如果達到大行預期全年純利去到10億元關，市盈率10倍，即使依家可能已屆行業黃金周期的中至後段，但睇嚟內地高端智能電話銷售放緩或者出現劈價戰前，應該仲未炒完。

委託顧問強化管理

嫌手機股太刺激，近期睇緊隻維達國際（03331），自SCA以每股11元收購之後，股價在11至14元之間上落快將五個月，即使唔識SCA，相信港人都會認識旗下紙巾名牌Tempo。

SCA入主，市場最期待係協助優化維達產品組合，upgrade成間公司。事實維達亦啱啱搵滙豐擔當顧問，幫公司進行業務戰略檢討，包括與SCA整合及提升大中華業務的合作機會，由十多年前對手恒安（01044）委託顧問引入先進管理後表現，珠玉在前，即使19.6倍PE唔算好平，但加埋行內聲譽卓著的SCA，仲要依家個價只係比SCA收購時多四毫幾，應諗得過。

上個月內地紙巾品牌五大之一，中順潔柔出盈警，話季績因為推動開支升而要大跌三至六成，股價都無跌幾多，多少反映紙巾有機會已經見咗短期低位。

滬港通有別於港股直通車的單向運作，今次是北水南來而南水亦有北去，到底最終誰能有較多得着，抑或創造雙贏，要放長雙眼等着瞧。不過，近日古勝收到不只一個內地商家朋友間接查詢有關在港成立證券公司，又或是買入現成經紀牌的渠道。

港交所注定做贏家

照咁講現成小型券商若無心戀戰，肯割愛頂讓應該唔憂冇人買。本來，內地投資者其實亦可直接向港交所（00388）入紙申領牌照，但過程快極都須時數月，要食頭啖湯都係要買現成最便捷。

以此推斷，相信當滬港通實施後，會有更多內地資金參與本港股市。理論上個餅大咗生意多咗，券商可受惠；但實際上，單靠做本地散戶客的小型券商基本上可能更難生存，事關既搶唔到銀行生意，亦做唔到內地客，所以咪心急亂掃本地券商股。講到底，古勝認為，最終贏家應該是港交所，依家有錢在手，長線逢低收集港交所，值博率會比投資房地產高。

古勝