絲絲講場:美銀美林打造超級精英

唔少金融公司都會有個戰績龍虎榜,用嚟激勵員工,幫公司撈多啲單。絲絲聽聞,美銀美林最近成立一個新嘅「精英俱樂部」,講明一年要做到800萬美元生意先入得,而「入會」福利包括一萬美元現金獎勵、被冠以精英經紀之名、可以在公司網頁Sell自己、擁有各項優先權等,對於呢個德政,公司就不予置評。

生意最少8球美金

絲絲認為,入到精英班,簡直係「飛上枝頭變鳳凰」,仲會得到好多着數添。例如可以參加公司喺度假村舉行一連幾日嘅「精英會議」;若然你幫公司搵到800萬美元以上嘅收入,額外嘅獎勵仲唔止一萬美元添!

其實依家美銀美林財富管理都有一個「Circle of Champions」,匯聚公司Top Sales,但入門門檻只係400萬美元佣金及手續費,比新嘅「精英俱樂部」少一半。其他大行好似摩根士丹利、瑞銀財富管理咁,佢哋類似嘅俱樂部要求每年收入達200萬至300萬美元,比美銀美林嘅要求低。

余絲韻