傷亡最高賠60萬
查一查資料，原來舊年貴陽政府已經為咗市入面6,295個渠蓋，幫襯財險買保險，總保費加埋都係12.7萬，濕濕碎。事實上渠蓋呢舊金屬好值錢，無論喺內地或者香港都可以賣到好價錢，所以成日畀人偷，途人一個唔覺意好似卡通情節咁Freefall入坑渠底，隨時搞出人命。
不過好彩嘅係，舊年貴陽市七單渠蓋所引起嘅事故，都只係電單車「中陷阱」，好彩人就冇事。財產損失嘅話，財險最高賠50萬；如果因為渠蓋被偷、損毁、人間蒸發，而令人命有傷亡，最高可以賠60萬元，醫療費就係5萬元。絲絲心諗，如果唔小心踩蕉皮跣親，「蕉皮險」又可以賠幾多呢？
余絲韻