絲絲講場:馬駿終認過檔人行

一向唱好中國經濟嘅德意志銀行大中華區首席經濟學家馬駿,早排傳出加入人民銀行,期後都冇乜動靜,最近佢自揭底牌,承認過檔,尋日仲向客戶發出名為《離開德銀 加入央行》嘅告別信,親口承認會離開工作咗13年嘅德銀,由下個禮拜開始,擔任人行研究局首席經濟學家嘅職務,成為人行近年少數嘅外聘人員之一。

馬駿令外界最深刻嘅印象,係佢一向唱好中國經濟,雖然德銀上個月都下調咗對今年中國GDP嘅增長預測,但係7.8%嘅預測值仍然高過好多外資大行。

着眼宏觀 少理波動

佢同時都係人民幣國際化嘅積極倡導者,早兩年參與撰寫《人民幣走出國門之路》,建議香港發揮離岸人民幣市場嘅「批發」功能,成為離岸人民幣嘅流動聚集地、融資中心、定價中心同財富管理中心。

馬駿喺告別信入面話,將會喺新崗位上盡全力工作,以後會少啲關注市場嘅短期波動情況,更加着重對中國宏觀經濟同金融改革有影響嘅中長期事件。喺任職德銀前,馬駿都曾經喺世界銀行同國際貨幣基金組織(IMF)做過高級經濟學家,擁有國際性機構嘅經驗。

余絲韻