老牌華資銀行永亨（00302）賣盤，經過幾個月嘅拉鋸終於進入最後直路，馮氏家族持有44.79%股權，可以袋返94億，原來佢哋仲有一批認股權，尋日公司話佢哋行使咗，呢個交易，又可以袋多幾千萬，相對94億元，零頭嚟啫。
尋日永亨宣布，就先前授出嘅認股權發約70萬股新股，其中馮鈺斌獲得約16.7萬股，馮鈺聲獲約11.3萬股，另外執行董事王家華獲約12萬股。呢70萬股新股當中，26萬股發行價為47.5元，20萬股係46.9元，其餘發行價為1元，即係話相對尋日收市價，折讓61%到99%。
絲絲粗略估算，馮氏兄弟合共有約28萬股，如果用尋日個價沽出，套現3,600幾萬元，但絲絲唔知馮氏兄弟嘅認股權行使價究竟係平定貴嗰批，暫時唔知帳面賺幾多。
不過，馮氏兄弟未必會即刻喺市場賣出呢批股份，可能直接等華僑銀行收購，一個唔覺意，單刁六月之後至完成，仲可以袋多每股0.46元嘅中期息。
唔少大行報告都話永亨個價十分抵買，華僑銀行好着數，不過計絲絲話，永亨一班股東都有不少甜頭，又有上年嘅末期息，又極有可能拎埋今年中期息，依家大股東認股權又多一筆，交易都不失為雙贏！
余絲韻