期指觀瀾：好倉過夜值博率低
港股連升五日，恒指昨日升41點，收報22,565點，主板成交縮至716億元，沽空佔大市比例升至10.65%，係九個交易日以來最高，反映淡友在大市作勢挑戰二月底22,986點前夕，積極性加強。
昨日50隻藍籌七成做好，點數升幅唔多，只拜騰訊（00700）一隻逆市向下，拖低指數52點，限制大市升幅。即月期指日市收22,554點，低水11點，成交4.89萬張。
昨日期指早市以22,551點開出，現貨開市一刻，見了全日高位22,750點後，好友再攻的意欲減低，午後膠着情況更為明顯，期指由一點十五分，至四點十五分收市前的三小時內，僅在22,526至22,588點的62點波幅內上落，好淡雙方無主動出擊的野心。
大市由21,137點累積反彈點數唔細，一連兩日出現陰燭收場，多少同日線圖恒指緊貼保力加通道頂有關。展望今晚美國公布三月就業數據，目前街外預測相當樂觀，非農職位估計增加20萬個。
賭大定賭細？主觀睇法係數據低過預期，可能打擊近日支持股市強勢的經濟復甦故事，勝預期的話，美股未必會跌，可是聯儲局退市理由更充分，權衡輕重後，今晚持好倉過夜的值博率唔高。
John Mullen