Market Insight：水泥股無理由唔買

技術上，內地兩會後無形之手唔見咗，港股自三月初高位22,986點插到落最低見21,137點，直到上月底，新興市場走資潮收斂落嚟，加埋聯儲局官員重申非常規貨幣政策對支持美國就業復甦的作用，港股呈V形反彈，去到昨日高位22,722點計，追番三月初跌幅八成五，短期升破22,986點，近四個月一浪低於一浪劣勢可望扭轉。

不過，萬一今晚美國就業數據太好，又再掀起市場對美國退市步伐加快的預期，指數隨時撻番落22,000至22,300點附近，繼續玩泥漿摔角。

古勝冇點你2014/04/04

萬里長空

唔放水又要靠基建

然而，近排炒股唔炒市已經係大趨勢，好似尋日騰訊控股（00700）腳軟，再跌穿550元，未改阿里巴巴決定揀美國上市，好消息出貨下一浪低於一浪之勢。昨日賓架界流傳SINA分拆的微博，在美國招股定價可能去到一五年60至65倍PE。看來，趁網股熱潮有見頂迹象，急於以天價上市刮到盡的唔只馬雲一人。

然而，騰訊無影響到二三線氣氛，綜觀28隻股仔升幅超過一成，相反跌幅多於一成股仔只有6隻，指數愈來愈反映唔到大市的氣氛。

總理李克強的中央經濟報告，訂全年GDP增長目標7.8%，中國首季GDP今個月十六號登場，街外預測會由去年同期7.7%放緩至7.3%，要達到全年目標，趁第二季鬆綁放水是合理期望。啱啱人行透過《金融時報》刊評論文章，無疑令大家失望，暗示現階段降存款準備金率刺激經濟，會畀市場錯誤訊息，影響去槓桿化的計劃。

既然放水期望短期幻滅，市場由其他蛛絲馬迹推測中央有乜板斧，令全年GDP達標，睇來睇去行番○九年「基建救經濟」舊路的呼聲最高。啱啱李克強又主持國務院常務會議，確定深化鐵路投融資體制改革，昨日鐵路股做好，中鐵建（01186）、中鐵（00390）分別升7.2%及5%，收報7.43元及3.92元。

中建材等回吐入貨

昨日滙證以新鐵路項目增長高於預期，估計真正放緩期要到「十三五」至出現為由，出報告建議增持中鐵建，目標價由7.4元調高到8.4元。瑞銀報告則估中鐵建今年新合約由去年2,160至2,170億元人仔，躍升至3,000億至4,000億元人仔，目標價睇10.5元，中鐵睇4.9元，同樣評為買入。

長遠而言，中國逐步實現城鎮化，短期推動鐵路投資及加快保障房發展，可唔可以吸收到鋼鐵業嚴重過剩產能，仲係未知之數，但舊年因老舊產能逐漸被中央勒令淘汰，加上煤價下跌之助，業績本已不俗的水泥業，實在無理由唔睇高一線。

春節後需求回升，加上水泥庫存回落，近期水泥價格已開始穩步上揚，昨日西部水泥（02233）、聯合水泥（01312）、山水水泥（00691）升得最多，但穩陣之選，無理由唔揀龍頭安徽海螺（00914）、華潤水泥（01313）及中建材（03323），三隻近排都升得唔少，或者捧場客可以等短線回吐入貨，三選一的話，古勝會揀營運槓桿最高，估值最低的中建材。

買電池股要做功課

超威動力（00951）自公布業績後，股價反覆向上，昨日高位見3.85元，收報3.81元，升2.4%，較上周低位3.11元反彈23.8%，且成交放量，並已收復50日線，走勢明顯轉強。其他電池股亦見蠢蠢欲動，天能動力（00819）昨日升4.1%，收報2.78元；中聚電池（00729）升6.9%，收報0.62元；飛毛腿（01399）升5.8%，收報0.73元；比亞迪電子（00285）升5%，收報5元；理士國際（00842）升幅更大，達12.5%，收報0.9元。

不過，上述電池股中，目前大部分並非主力做應用於電動車的鋰電池，要發掘真正能受惠於未來數年電動車產銷量大幅增加的股份，宜做足功課，以免搭錯車表錯情！

古勝