距離巴西世界盃仲有兩個月，唔少人都憧憬巴西藉住主辦呢個四年一度嘅足球盛事，救到當地經濟，點知評級機構穆迪大潑冷水，話巴西根本未Ready搞世界盃，要使好多錢做好基建，相對於經濟收益最終可能只係打個和，即係白做！
穆迪估計，世界盃為巴西未來十年國內生產總值（GDP）額外貢獻僅0.4%，預計基建開支佔當地一○至一四年整體投資金額只有0.7%。
穆迪又話，世界盃帶嚟嘅經濟益處僅如搔癢，咁係因為巴西嘅經濟規模太大，而世界盃所舉行嘅時間實在有限。
巴西承諾過籌辦世界盃會創造到360萬個職位。不過，巴西上年搞稱為「世界盃預演」嘅洲際國家盃嗰陣，所衍生嘅交通、衞生同埋治安問題，已經搞到民怨沸騰，巴士日日逼爆實屬平常事，令人質疑當地政府究竟投放咗幾多錢嚟改善基建。
世界盃固然可以提升巴西嘅國際形象，但同時基建落後繼而引起社會動盪，亦足以令國家蒙羞。嚟緊一六年嘅奧運又係喺巴西搞，希望當地政府肯揼本搞番好啲基建，省番靚個招牌啦！
余絲韻