日本神秘富豪齋藤一人曾經話自己靠三句口頭禪發達，就係「我真幸福啊」、「我真富足啊」及「只要去做，沒有做不到的事」！講真，孖妹覺得呢三句口頭禪普普通通，點夠本港散戶嘅廣東話口頭禪霸氣呀，每逢大升市或者大跌市，佢哋都會「唇槍舌劍」。近期港股走勢反覆，唔知近期魚缸內最火熱嘅炒股口頭禪又係咩呢？孖妹訪問咗50名匿名散戶，終於搵出答案，仲搵埋兩名資深證券行經理大爆呢啲口頭禪嘅「來龍去脈」！
高：英皇證券荃灣分行經理 高初定
朱：致富證券大埔分行經理 朱永年
高：近年港股走勢咁嘅樣，散戶梗係炒股唔炒市喇！你喺魚缸問十個散戶，我諗有八個都會咁答你，佢哋最鍾意炒濠賭股、科網股，有時跟住個大勢去炒，有時都會留貨過夜。如果大市唔係靠呢啲強勢板塊、大牛股撐住，恒指邊頂到咁耐呀！好似我呢個場，散戶平均年齡超過60歲，呢班人經歷過市場洗禮，已經可以冷靜面對大市升升跌跌，總之港股表現唔掂，咁咪搵股份炒作囉！
朱： 近期散戶多數炒市場上成交大、波幅大嘅股份，好似上周停牌嘅旭光高新材料（00067）、中信泰富（00267），科網股亦係佢哋至愛，例如博雅互動（00434）、雲遊控股（00484）、IGG（08002），雖然散戶成日都話「炒股唔炒市」，但投資策略往往忽略基本因素，多數追入市場上嘅焦點股、強勢股，或者買入跌過龍嘅股份，希望博反彈賺錢，其實咁樣真係唔理性，有時候我都會提醒佢哋要小心行事。
高：散戶成日都講呢句口頭禪o架喇，特別係啲大年紀嘅散戶，佢哋成日賺少少就沽貨，點知隻股票之後不斷升，咁個心一定唔舒服，咪呻幾句囉，呻完咪繼續炒股。
朱：其實你日日坐喺魚缸，真係聽到好多散戶嘅口頭禪，投資金句，因為佢哋經常性自言自語！有時候，明明隻股票嘅沽貨價已經係全日最高位，但如果隻股之後繼續升，基本上散戶都會哦哦，有時都聽到佢哋細細聲講「唉吔，沽咗先嚟升」！
高：呢句都幾應景！好多時散戶真係唔願止賺，又唔願止蝕，搞咗一大輪最後煲無米粥，唉！
朱：散戶日日見住對方，好多都做埋朋友，有時約埋一齊食早餐開早會，放假又會約埋一齊去旅行添o架！有時候A散戶唔願獲利沽貨，眼白白睇住隻股票升完又跌，卒之變蟹，B散戶就會話A散戶：「有胡唔食，罪大惡極」，呢啲說話真係好朋友先講得出口，雖然我係分行經理，但我都唔敢咁樣講！
高：老生常談，「唔好同股票談戀愛呀」何止係散戶嘅口頭禪，直情係金句喇！佢哋成日掛在口邊，不過係咪做到呢？
朱：散戶最大嘅弱點就係唔願止蝕，有時見到隻股票再跌，仲會走去盲目溝貨；另有一種就係因為佢哋靠嗰隻股票贏過錢，有日見到嗰隻股票突然大跌，於是就會忍唔住去撈貨，但整個投資過程可能係衝動所致，呢種「食過翻尋味」嘅投資方法其實真係好危險，完全由個人情緒帶動。
高：正常嘅！睇升市易過睇跌市嘛，事實上真係唔少散戶鍾意「買上唔買落」，佢哋覺得估邊隻股票大升容易過估邊隻股票大跌。不過，亦有散戶會「買落唔買上」，如果大市氣氛真係好差，佢哋睇準時機就會去沽期指。
朱：其實散戶嘅投資類型都幾兩極化，一種專門「買上唔買落」，另一種則專門「買落唔買上」，由於佢哋習慣咗呢種投資取態，眼見大市持續多日上升，有啲人依然唔願意買上，一心覺得個市會跌番落嚟！須知道，時間唔等人，投資唔跟住市場大方向去買賣，好容易錯失賺錢機會。
高妹：美國著名社會心理學家拜倫（Robert A. Baron）曾經有個研究報告指出，正面嘅語言表達同商業成功係存在高度正向關係，由此推論出只要你嘅口頭禪愈正面同積極，你就會愈有行動力去完成一件事情。話時話，你平時聽我講咁多嘢，有無發覺我嘅口頭禪係咩呀？
彩兒：我成日「左耳入，右耳出」，邊記得你講過啲咩呀？不過我有做功課o架！原來有啲負面口頭禪係一定唔可以講o架，例如「呢一世都唔會發達！」、「錢夠用咪得囉！」、「吓！點解咁貴o架？」專家話，呢啲說話背後存在負面認知，會令自己缺乏上進搵錢嘅信心，最後限制個人致富嘅可能性，所以叫大家唔好成日掛在嘴邊。
高妹：我記得呢，自己第一次同「星級分析員」陸東傾偈時，佢問我一個問題：「你知唔知有錢人同窮人嘅分別係咩？」嘩！呢個問題咁具哲學性，我當場口啞啞！然後陸東就解釋：「有錢人鍾意不停咁搵錢，而窮人就鍾意不停咁使錢。」我懷疑佢應該成日周圍問人呢個問題，好可能呢句就係佢嘅成功口頭禪。
彩兒：咁佢一定係有錢人喇！不過你唔使驚，我上網搵咗啲投資大師嘅口頭禪，由今日開始我哋就日日練習，相信不久將來，我哋都會變做贏家嘅！
高妹：真係估唔到我嘅炒股人生當中，除咗背股票冧巴外，竟然有一日仲會去背埋成功口頭禪，真有趣喇。
•蘋果公司創辦人喬布斯：「如果不對，你就證明給我看。」
•日本巨富齋藤一人：「我真幸福啊」、「我真富足啊」及「只要去做，沒有做不到的事！」
•美國股神巴菲特：「擁有一隻股票，期待它下個早晨就上升，是十分愚蠢的。」
•德國股神科斯托蘭尼：「要想取得股市勝利，關鍵是對金錢有一個正確態度。」
•日本「經濟戰略之父」大前研一：「別相信Google，自己想的才正確。」
•「華爾街教父首徒」歐文•卡恩：「做投資，最重要的不是跑得比別人快，而是持續在跑道上。」
高妹 彩兒
若有料報畀高妹同彩兒或有嘢問，可電郵money.biz@opg.com.hk