絲絲講場：艾爾敦講波欖新歡
一年一度嘅香港國際七人欖球賽話咁快就嚟喇，絲絲記得斐濟隊係一二年、一三年嘅冠軍隊，亦係今年嘅大熱隊伍。不過，欣賞過呢項賽事逾廿次嘅中東滙豐銀行非執行主席艾爾敦，就撐新西蘭隊今年有望奪冠！
氣氛超似開Party
要數艾爾敦第一次欣賞香港國際七人欖球賽已經係一九八○年，當時係第五屆比賽！佢仲記得當年係落住雨，成個草場都濕晒，時不時都要叫人泵走啲水先可以繼續比賽，艾爾敦真係犀利，連賽果12比8都記得，由斐濟隊擊敗蘇格蘭隊，第三次奪冠。
講到最難忘嘅事？艾爾敦就話係氣氛。比賽場地愈搬愈大，容納嘅觀眾愈來愈多，氣氛就梗係有增無減啦，而且愈來愈國際化！絲絲都非常認同，Rugby佬全部都係肌肉男，大大隻，撞嚟撞去已經夠晒刺激，一班欖球迷就High到拆天，氣氛好到不得了。艾爾敦就話，依家每年都好似開Party咁，近年愈來愈多中國人睇比賽，仲會參賽添！
話明支持新西蘭隊
話晒都欣賞過超過廿次七人欖球賽，唔知艾爾敦今年睇好邊一隊呢？艾爾敦就話過去兩年都係斐濟隊贏，今年當然有機會啦，不過佢就話支持All Blacks（新西蘭國家代表隊）啦！
余絲韻