絲絲講場:狼人歸正軟銷道德

喺電影《華爾街狼人》最後一幕,出獄後洗盡鉛華嘅男主角轉咗行做勵志講師,拎起支筆要台下學生「Sell me the pen」,用當年訓練豬朋狗友推銷垃圾股票嘅方法,傳授銷售技巧,帶出做Sales要了解對方需要、製造迫切性嘅道理。

網上教路盛惠二千

現實中嘅「華爾街狼人」喬丹‧貝爾福特(Jordan Belfort)確實係一名教Sales搵食嘅勵志講師,日前佢接受訪問時,不忘推銷自己教緊嗰套叫「Straight Line」、淨係網上「補課」都盛惠2,316蚊嘅推銷技巧,提到語調係語言產生影響力嘅秘密,能夠主導對話,而且要學前總統克林頓咁,做一個主動嘅聆聽者,千祈唔好講廢話。

不過,今時今日嘅狼人更加強調發財立品,話營銷倚仗嘅係「道德嘅游說技巧」,斷言「冇道德嘅成功叫失敗」!佢直認自己犯法,抵坐監,每當其他人問佢「點解你可以啪咁多丸」、「點解會咁」嗰陣,內心會好唔舒服。

海景豪宅生活優悠

諗番喺戲入面,發錢寒到出汁嘅佢,用電話傾生意嗰陣拎住個聽筒一路奸笑,一路對個客做粗口手勢個樣,真係令人有滄海桑田嘅感覺。

之但係,咁唔代表佢嘅生活變得好平民,事關貝爾福特依家喺加州曼哈頓海灘住緊間4,000平方呎、坐擁大海景嘅豪宅,而且有個未婚妻。

余絲韻