絲絲講場:新秀麗賣袋有「星」味

風靡中港台嘅韓劇《來自星星的你》雖然已落咗畫,但一班星星迷仍然好瘋狂,而新秀麗(01910)就最漁翁得利,因為佢哋喺部戲未爆紅之前,就好有慧眼搵咗男主角金秀賢做Samsonite Red代言人,依家唔少人仲拎住金秀賢啲劇照去買袋添。

帶挈二月做3300萬生意

絲絲尋日見到新秀麗班高層,佢哋就話,喺舊年八月、當時套劇未出街就簽咗金秀賢一年合約,真係好幸運可以簽到佢,令品牌知名度同埋生意都提升咗好多。原來金秀賢喺劇中孭嘅一款袋,一星期就斷貨。佢哋乘勢喺一月出新廣告,加上星星效應,Samsonite Red喺韓國單單二月份就已經做咗430萬美元(約3,354萬港元)嘅生意,比舊年足足升咗兩倍,認真犀利。

講開又講,公司睇到韓國生意咁勁,加上中港都好多星星迷,新秀麗打算將Samsonite Red呢個品牌拓展到香港、內地等市場,對今年生意增長仲好有期望。絲絲知道金秀賢八月份會嚟香港幫新秀麗做宣傳,各位星星迷又要追星喇!

余絲韻