話就話好多國家嘅經濟未Recover，但百物依然騰貴，就嚟想食個英式早餐都食唔起，皆因受天氣乾旱、病毒同需求增長影響，八種英式早餐材料，包括咖啡、橙汁、小麥、糖、牛奶、牛油、可可豆同豬肉價格，淨係今年都升咗24%，再加埋烏克蘭政局不穩，未來價格有升冇跌，食白粥可能平啲。
英式早餐唔少得杯香濃咖啡，但巴西旱災，阿拉比卡咖啡期貨突破每磅2美元嘅兩年新高，今年以來升幅達70%，糖價升6%；香噴噴嘅煙肉亦見漲價，因美國豬流感肆虐，刺激芝加哥豬肉價格今年勁漲逾40%；喺新興市場需求增長下，乳製品價格持續上升，美國牛奶和牛油價格今年以來就分別大漲20%和17%。
小麥都貴咗，全因美國嚴寒天氣打擊收成，再加埋主要穀物生產國之一嘅烏克蘭政局不穩，小麥貴自然令到麵包都貴，一旦印度、東南亞同澳洲再爆發乾旱，小麥價格勢進一步上揚，到時食塊多士都要畀多啲錢。仲有可可豆，今年貴咗8%，巴西乾旱加上美國橙爆發病毒，亦刺激橙汁價格大漲12%。
其實，除咗自然因素，投機炒作亦係農產品漲價嘅成因。原油和銅等價格大冧，對沖基金同其他投資者惟有炒農業商品，農產品淨長倉合約推升至四年半高位，助長漲價。
隨住厄爾尼諾現象所帶嚟嘅極端天氣，今年稍後可能殺到，農產品價格恐進一步上漲，食品生產商、餐廳食肆同零售商所面臨嘅壓力將愈來愈重，隨時把成本轉嫁畀消費者。
余絲韻