絲絲講場：英皇張炳強回憶拍賣人生
絲絲尋日去咗個物業拍賣會，竟然撞見英皇國際（00163）執行董事張炳強（Donald），唔講唔知，原來Donald做過拍賣師，仲拍到靚價添。
Donald同絲絲講，八十年代嗰陣，做過九年拍賣師，當時個市幾旺，最勁試過拍賣筲箕灣舊樓，爭到100口價，由5萬元搶到約15萬元賣咗，佢話依家市況唔同晒，物業拍賣往往要多次減價先有承接。
羅馬集團拓拍賣業務
今次個拍賣會係羅馬集團（08072）旗下測量及顧問行搞嘅首場物業拍賣會，佢哋主要從事資產評估，今次係為拓展業務試水溫，尋日拍賣嘅5個住宅盤，除咗黃大仙翠竹花園低層單位喺拍賣前賣出外，其餘4伙都未獲承價而被收回，羅馬集團主席及行政總裁陸紀仁就認為樓市平穩。
余絲韻