絲絲講場：滙豐「童畫」式撐港欖
香港國際欖球七人賽就快開鑼，呢個盛事係香港運動界特色之一，場內場外都熱鬧非常。絲絲成日覺得呢項運動對亞洲人真係好唔公平，如果冇外援嘅話，佢哋又點夠肌肉一舊舊嘅鬼佬鬥？
但絲絲知道滙豐贊助咗「支持香港隊」嘅繪畫比賽，有好多好可愛嘅小學生畫幅靚靚畫支持運動員，香港隊隨時打破物理定律打贏外國隊。
得獎人睇波做球僮
絲絲去咗滙豐總行轉咗一圈，見到「支持香港隊」比賽入圍嗰40幅畫，由滙豐員工喺呢個星期投票決定邊幅最好，兩星期後就公布結果。
中學組得獎者可以拎到「國泰航空/滙豐香港國際七人欖球賽2014」入場券，小學組冠軍就可以喺三月三十日決賽當日做球僮，如果絲絲細幾年嘅話，真係會認真考慮吓參加呢個比賽。
有個小妹妹同絲絲傾偈，話佢畫一班女仔打欖球嘅情景，之後幅畫入咗圍，搞到佢心跳加速，睇嚟佢好想喺決賽做球僮喎！佢仲話，欖球係好適合女生嘅運動，但絲絲覺得自己一落場應該就畀人撞散。
余絲韻