絲絲講場：宏利何達德學識「馬馬虎虎」

宏利金融（00945）行政副總裁兼大中華區總經理何達德，接手宏利香港差唔多十年，而保險同財富管理業務都有唔錯嘅進展，而佢嘅廣東話同普通話都稍有進步，識得幾個馬字相關嘅四字詞，其中一個就係「馬馬虎虎」。

何達德尋日同幾位管理層約埋一班老友記見面，其中之一係強積金女王吳智珊，舊年強積金半自由行錄9.4萬人轉會，有逾四成流咗去宏利公積金信託，「強積金女王」呢個美譽真係實至名歸。吳智珊好Happy咁祝大家馬年進步，宏利業務就一馬當先。

坐喺旁邊嘅何達德就話，自己嚟咗香港近十年，識聽些少廣東話，近年要睇埋內地業務，普通話都識講兩句，馬字相關嘅四字詞呢？佢都識喎！之唔係「馬馬虎虎」。

何達德講笑真係叻，氹得大家幾開心。不過，今時今日做保險，一啲都唔可以馬虎！監管條例愈來愈多，投保人又愈來愈Smart，前線保險代理、後勤人員，甚至最上層嘅管理層都一定要做保險專家，先可以滿足到各方面嘅要求。

余絲韻