絲絲講場:「橋王」梁永祥財藝相通

人稱「卡王」嘅新鴻基金融CEO梁永祥(William)計仔多多,佢任職恒生銀行(00011)時已經表露無遺,呢位多橋王仲將好多計仔帶入佢啲公職入面,兼且拉埋黃遠輝落水,接替佢做香港舞蹈團主席添。

講到搞藝術同商業,William話冇分別嘅,對於藝術家嚟講,點樣去維持同埋延長藝術生命係重要課題,所以佢哋要識得Market自己,無論係劇團定舞蹈團,都要識得寫Proposal,要識得寫盤數出嚟,咁至搵到贊助。依家佢係香港演藝學院董事會主席,加入咗呢啲教學生Marketing嘅課程。

96蚊八達通有段古

想當年佢接手做香港舞蹈團主席時,要推出一個名為《笑傲江湖》嘅舞劇,William唔想台上台下人數差唔多咁醜怪,就膽粗粗提議加歌曲,就係咁樣,個表演做足五場,場場爆滿。舞蹈團嘅資助比例,由高峰期嘅九成幾降到六成幾,即係門票收入大為改善。佢離開舞蹈團時,引薦咗黃遠輝做主席,查實黃同舞蹈都好有淵源,當年佢經常搵舞蹈團幫明愛籌款,熟悉舞蹈團嘅運作。

William啲橋,都用好多喺公司,適逢今年喺新鴻基金融45周年,公司整咗幾千張特別版八達通送畀啲好友。

佢話張卡有96蚊儲備,絲絲好奇點解唔係45蚊,襯番公司成立年份,原來條橋係William諗嘅,佢話張卡得45蚊好似太少,公司喺一九六九年十二月十五日成立,就將69加12再加上15,結果就係96,於是咪變成96蚊囉。

余絲韻